24+25 週只是忙著一件事：準備考車。
第廿四週我差不多每日練車，然後將路試改在6月26日（失敗而回）。
第廿五週完全無學車，因暑假師傅 schedule 十分爆，完全沒時間。廿五週亦是仲夏節週。人不在港，幾乎忘了端午節。好掛住食荔枝。
廿四五週完全是盛夏，超熱。每晚都要用 portable AC。
這兩週在忙碌中渡過。很多生活細節都在緊張的情緒中被遺忘。
仲夏節前後，鄰居的孫女來了。哥哥和孫女同年，而且孫女性格不錯，亦有教養，哥哥和細佬都鐘意跟她玩。開心假期。
Month: June 2023
{ driving test 考車之路試 }
今早第一次考路試，結果肥佬。
在瑞典考路試通常要在市中心和高速公路駕駛，完全沒有特定路線。我先由市中心上路到高速公路，一路順利，直到要由一條路速 40 (kph) 轉出去路速 80 的路才出現問題。平時上高速公路 (landsväg /country road) 會有條 accelerating lane 可以加速再轉線出高速公路，瑞典文叫 påfart (direct translation: on speed)，可惜今日我駕駛的小路沒有 accelerating lane，一右轉出高速公路就要 full gas 直上 80 (這沒有accelerating lane 就要轉上高速公路，瑞典文叫 infart) 。我要先停，等路上的車先走，再轉上去高速公路。問題出在我沒有100% full gas 踩油直上80，加上後面有車，然後 instructor 就直接幫我踩油上到車速 100。
當他幫我踩油時，我已經心知不妙，但試還是要繼續考。
在市中心駕駛十分順利，路人和車都不多。Instructor 叫我在一個小停車場泊車。他叫我停在一架車左邊。平日我泊車不算很好，但亦不叫差。今次泊車呢，由於那已停泊的車是架大車（像小型貨車），100% 填滿了那泊車位，若在平日要泊在那車旁邊，那車一定不能打開司機門，而且我的車也比一般私家車大，我泊車時泊得十分貼那車，差不多要撞上去，然後 instructor 叫停。
考完就直接被告知肥佬。他說我在市中心駕駛沒問題，但在高速時要 “interact with other road users”, “need to adjust speed according to the circumstances” 同埋最後 “drive with sufficient safety margin”。
失望是有的，但覺得這經驗十分寶貴。
今個星期去芬蘭，只得在假期後再繼續我的考車之旅。
{ after midsummer 仲夏節之後 }
完全沒心理準備下過了仲夏節。今年是搬入來 Sundborn 後第一次在村內慶祝。
由今日起，我們又進入夜照又比日照長的日子。即是，離秋冬天不遠了。XDDDDD
仲夏節是瑞典重大慶祝節日之一，和聖誕節慶祝同樣重要。一樣都是食 sill (herring) 的日子！
{ on summer days 夏日碎碎念 }
剛過去的冬天很漫長，凍的日子又多。春天遲遲未到，上個禮拜還未見植物長新芽，下個禮拜忽然一片綠油油。一夕之間夏天居然到了。面對夏天的驟來，我心態未能調整過來，身邊的朋友老師家人已經計劃好暑假出遊，我只是黑人問號，「下，夏天啦？！」
今年的春天實在是太短，又或者是我留在家的日子少了，完全沒時間清除前後園的雜草。其實早在一年前已打算寫園中生命力超強的蒲公英，只是寫個開頭就停住，轉個頭就忘了。今日碎碎念就想寫寫近日見聞感想。
- 蒲公英：剛搬到 Sundborn 時花園在綠色的草地上有一大片黃色花海，以香港人少見蒲公英來說，我那時覺得花海好美。隨著夏天的到來，那片黃色的花海變成一片白色，然後我才有所覺悟：蒲公英花海是由於花園疏於打理的結果。再然後留意到蒲公英長得又多又壯，綠油油的草地被這外來的 invasive 品種佔據。鄰居老伯伯見及此，把自家的 ogräsupptagare (weed puller) 借給我（若我家的蒲公英吹到他們花園亦會加重他們的工作量），慢慢把那片白色的花海移除。
蒲公英的生命力超強。根莖在泥土下不易拉出來，而且風一吹那成熟的白花，它們又在花園其他角落扎根起來（真係超滴汗）。第一二年的夏天，我變成蒲公英殺手，不停地將大而壯的蒲公英連根拔起。一拔起就要立即放上三輪車，否則白色的種子掉落草地上，明年又要再拔。沒完沒了。到了第三年的夏天，我改變策略，將黃澄澄的蒲公英花摘下來做果醬。蒲公英果醬又名「窮人蜜糖」，有一種特別的味道。只是制作費時，工序亦多，今年我就放棄了。今年花園的蒲公英飛快地擴散開來，那一片白色花海只令我有感今年沒時間打理花園。
有時間再分享蒲公英果醬制作及照片。
- Falun 的意大利餐廳 Basta!：Basta! 位於 Falun 市中心黃金位置，在大商場 Galleria 附近。話說有日打算去食意大利粉，見餐廳門前已放好戶外餐枱櫈，打算推門進內。一推才發現門鎖死了。門上的營業時間寫著在黃昏，午餐則只限在周末。怎麼在這熱辣辣的夏天餐廳中午關門不營業呢？！有次跟奶奶午餐，一問之下得到答案。開在香港黃金地段的餐廳一定會 maximise profits，管他中午生意額有限，他們一定會開門營業，盡做，盡賺；而且香港鋪租很貴（超貴），可以開門做生日的日子租客一定不會關門。在瑞典，我不清楚鋪租價錢，但 hiring costs 就很高，因為這邊的稅率高（通常僱員收到的是 after tax 的薪金，跟香港不同），身為僱主每月亦要為僱員交稅。所以這間 Basta! 寧願中午關門也不願在中午時份請人開工，不化算。這不是歐洲人「比較懶」的表現，只是「錢」的問題。最後去了 Galleria 的意大利餐廳食午餐。
- 學車：考試時間一改再改。由六月頭因病改到六月中，六月中又覺得自己未準備好而改到六月尾（後悔沒考）。現在改到六月尾又要再改因為我們要去芬蘭放暑假 。現在考試暫定在 week 26，放暑假前考車。我在3月頭考完理論試，疫情後改例，要在理論試合格後四個月內考取車牌，對我來說即要在7月頭前考到車牌，否則要重考理論試。疫情前則要兩個月內考取車牌。在過期前我想考一次車牌，有50%的機會合格。就算不合格，可以知道考試程序和要求也值得，當是一次經驗也值回票價。希望一 take pass。
- 花粉：天氣炎熱，今春夏兩季的降雨量又少，空氣中飄浮著大量花粉。每年春季，無論天氣有多好，我都不會將剛洗好的衣物被單曬在戶外，因為雲先生對花粉過敏，哥哥很不幸地亦對花粉過敏。春天剛來時，哥哥睡到半夜就嚴重鼻塞，完全不能用鼻呼吸。每日早晚兩次哥哥都要飲 antihistamine 藥水和噴鼻才能安然睡覺。細佬在兩個禮拜前亦無恙，我以為他跟我一樣對花粉免疫，可惜近日他忽然眼晴痕癢，雲先生經驗老到，餵細佬飲哥哥的防敏藥水，一覺無夢。過幾日後他那對眼睛居然腫起來，那晚臨睡前我居然忘了餵他飲藥水。那晚他醒來兩次，一次嚴重鼻塞，另一次他只是指著眼睛哭，應該是眼睛不舒服。第日我立即去藥房給他買了眼藥水。從來沒想過落雨對有花粉敏感的人是如此重要。現在哥哥早晚兩次飲藥水噴鼻，細佬就早晚兩次飲藥水噴鼻滴眼藥水。以前住香港從未覺得自己沒鼻敏感是特別幸運，現在一家四口只有自己對花粉免疫，真正感恩。
- Lupine：是種美麗的花，有很多不同顏色。這花是外來品種，十分 invasive，不是瑞典本地花卉。根據雲先生所言，在七十年代，lupine 非常為瑞典人所喜愛，很多人買種子回家種植。可惜慢慢地由於花朵上的種子很易傳播，lupine 在郊外自然大量繁殖。現在通常在森林路上、路邊或在家中花園都輕易可見此花的蹤影，而且一見就是一大堆。
有日鄰居伯伯給我們看他花園的傑作：他倆老種植的不同蔬菜！見有幾株覆盆子，我問是否野生（野生覆盆子特別甜）？老伯伯說原本有很多棵覆盆子，可惜被很多新長嘅 lupine 迫死了，只剩下現在那幾棵。非常可惜。
近日揸車接送兩兄弟，在森林路上總會看見一位婆婆，手執一大黑膠袋，在做著什麼。開始我們以前她正在清潔路邊垃圾，過了幾天才留意到原來她正在清理路邊的 lupine！雲先生說她應該是本地義工，我說我都想幫手出一分力！雲先生說：「我覺得 lupine 好靚啊！」我無言。
- Tick / Fästing：在香港我從來未聽過 tick，到現在亦不知道 tick 的廣東話名稱。Tick 是一種小動物，大小像隻飛蚊，夏天匿藏在長著長野草（tall grass) 的地方。跟蚊一樣，有些 ticks 身上有傳染性病菌（通常是 Lyme disease），若被它們付在身上，後果可大可小。在我第一次去芬蘭的渡假屋時，雲先生告知我 ticks 的存在。而第一次見 tick 付在人身上，是在上年暑假的芬蘭，在雲先生的腳上（十分噁心）。幸好在芬蘭有 tick remover，很易就可以將 ticks 移除。回瑞典後我亦買了個 tick remover 回來看門口。住在瑞典的我們，（現在）在兩兄弟臨睡前會檢查他們身體，以確保沒有 tick 在身上才讓他們睡。上年哥哥的手指尾就被付上了。
當你見一隻 tick 付在身上，不用驚慌，一定要保持冷靜，第一時間留意 tick 的頭部是否已經鑽進皮膚內。不要嘗試把它弄死，因為它死前會由口中釋放病菌出來。沒有 tick remover 可以用眉夾 (tweezer) 把它夾出來。最緊要手定。
由於天氣越來越熱，現在就連瑞典中部都開始有 ticks (它們不愛凍的地方）出現。住在歐洲的朋友請留意，夏天去草多的地方最好著長褲，噴蚊怕水。
{ week note 23/23 週記 }
去咗首都 Stockholm 一趟，見咗朋友家人！第一次一個人帶住兩個仔出遊，一切都超順利，超感恩。
- 雲先生今個禮拜又出差（哎，心入面無限嘆氣），然後佢建議我同兩個仔星期五去 Stockholm，佢星期五晚喺大伯屋企 join 我哋，周末一齊喺 Stockholm 過。我諗下覺得可行，兩兄弟又可以見下唐大佬，幾好喎。
- 我仍然有咳，比起之前已經好咗好多，起碼臨瞓前唔使再食漁夫之寶。
- Magnum 嘅 After Dinner 好正啊，size 又細，啱晒俾小朋友食 ─ 唔使俾佢哋食咁多，哈哈。
- 呢個禮拜好鬼熱，有廿五度。日日藍天唔見白雲 = 暴曬。
- 出遊日決定帶大 pram，因為大 pram 上扣住個 ståbräda (standing board)，哥哥可以企喺上面。我好怕喺 Stockholm 走失咗佢，唔知喺邊度搵佢。係辛苦我要一推二，但一定好過擔心佢跟失我。
- 講都唔信咁好彩。喺去火車站嘅路上居然見到朋友，佢都同我哋一樣去 Stockholm long weekend！更好彩嘅係，佢同我哋同一車廂！最後佢同人調位同我哋一齊坐四人餐枱坐，超感恩啊！
- 朋友上火車時幫我帶住兩兄弟上車，我就自己搞掂部大 pram；喺兩個鐘頭四十分鐘嘅旅程中，我仲可以單獨同哥哥去廁所！好彩過中六合彩！
- 我兩個仔出名乖。3個鐘嘅旅程都幾乎可以坐定定。哥哥100% 坐定定，係細佬臨尾要喺我同佢個位上面行下玩下。剛兩歲，我覺得佢已經做得好好。朋友表示十分 impressed，佢哋阿媽我，就覺得好驕傲！
- 落火車當然係朋友幫我睇住兩個仔，我自己搞掂部 pram。我真係開心死啊！
- 去到 Stockholm T-Central station，住喺 Stockholm 嘅香港（媽媽）朋友已經同囡囡喺車站等我哋。你話我幾幸運？！福星高照！
- 同朋友+囡囡（一歲多少少）食過 lunch後喺附近散步。今日又眼界大開。今個星期五喺高中畢業生慶祝嘅日子（瑞典文叫 studenten)，佢哋係包架貨車（！！！）喺上面播歌開 party！超嘈啊！仲有啲揸住車，開晒窗，坐喺窗上面，勁危險囉。最唔 make sense 嘅係，有啲黑人同學係咁揮佢哋國家嘅旗（非洲，中亞國家都有）。心諗咩料啊。
- 唔好誤會我，我無歧視佢哋。只係佢哋千辛萬苦要離開佢哋自己嘅國家，來到瑞典呢個福利國家，俾佢哋免費讀書，仲享有各項福利，佢哋唔係應該感謝瑞典，揮瑞典旗咩？如果佢哋真係咁愛國，又何必要離開？自己國家打仗，佢哋唔為自己國家出一分力，反而千揀萬揀來到瑞典，而家又來「proud of their own countries」，又係咩玩法？
- 我問雲先生。雲先生話記者訪問佢哋，佢哋話想俾父母見到佢哋揮自己國旗喎。哈，咁使唔使喺街上揮呢？返屋企係咁揮俾父母睇咪得囉！有見及此，有啲學校而家禁止揮旗。
- 重點係，路上有大量畢業生租嘅車，好嘈，而細佬同妹妹都要瞓中午覺。哎哎哎。
- 喺首都呢三日係開心嘅，兩兄弟可以見親戚，有得玩又有得食。
- 呢個 trip 嘅首要目的係帶兩兄弟去 Naturhistoriska Museet (the museum of natural history)，睇動物同骨頭。
- 信不信由你，我同雲先生第一個 date 係去同一個博物館，不過係喺哥德堡，哈哈。
- 旅途一切順利又愉快！完。
{ week note 22/23 週記 }
今個禮拜終於去睇咗醫生。好消息係無中肺炎，咳嗽無傳染性，大家都安樂。
- 今次睇醫生唔係去平時睇開嘅疹所 vårdcentral，而係被約去睇傳染病嘅疹所。入到去疹所接待處登記，佢話我早到咗，但唔好喺等候處等，因為唔知我有無傳染病，驚會傳到其他人。我話我出去出面等，差唔多時候再入來。再入去嘅時候門口放咗塊大牌，寫住如果已預約，入去不用登記，只要等候叫名就可以。哈，仲唔係歧視我？！
- 抽血後見醫生。醫生聽完我心肺背脊，話我身體有炎症，但唔知係咩炎症。我同佢講我有喘鳴，佢話佢聽到，但唔係哮喘。我問佢有冇勁啲嘅藥可以俾我止咳，佢話有，但治標唔治本，而且隻藥嘅副作用係有肺炎 (pneumonia)。我話咁我用返漁夫之寶算啦。
- 由於睇完醫生後要趕去幼稚園接兩兄弟，今日我第一次租咗 e-scooter (elsparkcykel) 。因為之前未用過 e-scooter，所以我提早咗時間，睇地圖搵到架車仔，諗住試下點用先。e-scooter 最高車速為20kph，比我行快一倍，但由於我唔熟路，有時會去錯第二條路，或者駛遠咗。可以喺 Falun 市內借 e-scooter 真係好方便。如果第日我趕時間的話，我一定會再租。最後成功接到兩兄弟搭巴士返屋企。
- 呢個禮拜天氣好好，氣溫都有成廿度（最高），但超大風，吹到我頭都甩，仲覺得好凍。
- 周末有 Åfesten，簡單來講就係小朋友嘉年華，Falun 年度節目。今年我哋第一年參加，兩兄弟好開心。我哋用500kr 買咗12次 rides（人頭計），兩兄弟玩得好開心！我覺得好值得。雲先生話：佢哋玩完呢度唔使去 Liseberg 啦（Liseberg 係哥德堡嘅主題公園），差不多嘅嘢。喺 Åfesten 有碰碰車玩，可惜哥哥未夠120cm 所以無得玩。希望下年佢可以玩到！雲先生同哥哥玩咗「小朋友」版嘅過山車，哥哥超開心啊！
- 春天嘅到來等於又係 gardening 嘅時候！
- 呢篇週記寫咗成個禮拜，放咗喺 draft 度，想加相，而家。。。。就放棄了，哈哈。
{ week note 21/23 週記 }
呢篇遲來嘅週記寫於 week 22 嘅星期五。2023年決定寫週記後，想保持52篇週記嘅完整性，唔想無疾而終，最後都係決定寫埋佢，遲到好過無到 XD
- 成個禮拜都咳，咳到甩肺，流鼻水。完全無胃口。仲發低燒。真心覺得自己係條可憐蟲。
- 好在雲先生今個禮拜喺屋企，如果唔係都唔知點算。
- 雖然咳到噉（勁多痰，有一朝五點俾自己呼吸嘅喘鳴嘈醒），但今個禮拜雲先生生日，大伯一家連埋奶奶來咗一齊慶祝。好在 managed 得幾好，一咳就立即走入廁所，所以都無咩大影響。
- 然後鄰居又請我哋去食晚飯慶祝，我成個人好攰。最後居然因為哥哥要返屋企廁所而乘機（我同佢）早走咗，哈哈。
- 今年送俾雲先生嘅生日禮物係一對舒服行山鞋，夏天放假可以著。當然仲有瑞典生日慣例 breakfast in bed。
- 居然都揸咗次車。改咗考車期到 week 24。對成件事好失望，係咪真係到時 ready 去考試㗎？
- 細佬自己學識咗吹泡泡，哈哈，無飲/食㗎！佢勁開心！
- 好多細微嘅事令我覺得好開心，但又咳又鼻水真係另我覺得好灰。雲先生頂我唔住，最終佢迫我預約咗 week 22 睇醫生。
- 好快到瑞典夏天，可惜自己病咗，完全無 appreciate 嘅心情。好似活喺個空殼嘅世界入面咁，對好多嘢都關唔起心。成個人都好灰。
- 因為咳成噉，星期日無去到老爺哥哥嘅葬禮。雲先生帶埋兩兄弟去咗。我其實完全未見過老爺嗰邊嘅親戚，但我真係去唔到。老公都已經好多年無見過佢哋。
- 病咗，好身不由己。
港媳講瑞 