今日禮拜又忙又開心。
住喺香港嘅時候完全無理過二十四個節氣，估唔到來到瑞典先開始認識佢哋。
今日係春分，即係今日起春天啦！唔怪得之今日瑞典中部最高氣溫有八度，路面上厚厚嘅冰開始螎，周圍都係水，好濕。
春分嘅意思係，日長同夜長一樣，明日起瑞典嘅日照開始比夜照長，好嘢！而家日出五點幾，日落六點幾，見藍天嘅日子多咗好多 😀
期待植物發芽嘅季節！
今個禮拜好頹，無心力做任何事，只想瞓覺。
承續上個禮拜，星期一二兩兄弟在家休養（之前細佬流鼻水，哥哥發燒）。諗住星期三終於可以返學，估唔到哥哥一早起身話自己對腳痛，行唔到，左腳板放唔到落地。趁住雲先生送細佬返學，我打咗去1177（健康咨詢熱線），等咗成四十分鐘後接線護士叫我哋立即送哥哥入急症，怕佢會有骨折或者發炎。哎，雲先生呢位 CEO 立即又要變身做柴可夫送我哋入急症。
今次入急症好快，一個鐘已經見咗兩位醫生，檢查咗確定無事。應該係感冒菌影響到，呢排好多小朋友都有同樣問題，食止痛藥就okay。由準備出門口到睇完醫生，其實哥哥對腳已經完全無事可以行路。無事一身輕。同佢喺醫院 cafeteria 食完 lunch 後散步返幼稚園，轉頭即刻卜下午學車。
放學返來兩兄弟都好攰。第日哥哥又發燒。哎，星四五兩兄弟又喺屋企。啊，我同雲先生都好攰。明日星期一學校假期唔使返學，即超長周末。
今個禮拜係咁多。晚安！
週十考理論試 pass 咗開心咗幾日。成為兩個小朋友阿媽後認真認識到「機不可失」嘅真理。有嘢想做最好諗都唔好諗做咗先，否則隨時唔知幾時可以做想做嘅嘢。
好彩上星期三即興考咗理論試，如果唔係唔知幾時先會去考。上星期四細佬流鼻水，我留咗兩兄弟喺屋企（雲先生人在巴黎）。根據以往經驗，小鬼有唔舒服如果再返學，病情只會惡化得更快。星五細佬無咩鼻水，哥哥完全無事已經喺屋企無所事事咗一日，於是兩兄弟照常返學，可惜細佬夜晚開始發燒，好彩係低燒（卅八度），一晚無事。星期六下午哥哥毫無預兆發高燒（哎），成晚都燒，最後零晨三點幾終於退燒。星期日哥哥繼續發燒。（今日仍然發燒）小朋友一病，身為父母就超攰，要成晚起身 check 佢哋，發燒又要檢查體溫餵食藥。
哥哥同細佬瞓同一間房，各自瞓自己張牀。以前哥哥一人瞓一間房，有開夜燈。自從細佬搬入去同房後，除非哥哥發惡夢，否則唔再需要開夜燈。兩兄弟同房有好有唔好。記得細佬未可以瞓過夜嘅時候，夜晚一醒就會大喊。我同雲先生瞓隔離房，一聽到喊聲就仆到去細佬張牀睇下咩事。哥哥好利害，完全無俾細佬喊聲嘈醒。唯一嘅例外，即係唔好處，就係當兩兄弟都病（i.e. 噚晚）嘅時候，一個會喊，一個會叫，好易兩個一齊醒。哎，兩個都醒好煩，一個大人真係兼顧不下（滴汗）。希望哥哥今晚唔再發燒。
今朝送完兩兄弟返學後去圖書館繼續溫習考車理論。由十點溫到十一點半，真心覺得很懨悶，不想繼續溫習落去。
上運輸局網站查看一下，見今日下午一點十五分可以考試，心動不如行動，動幾下手指，付款，確認。我的第一次考車理論試就是在這麼倉猝和衝動的情況定下（好明顯我是個心急人）。
內心焦慮又緊張，有點興奮，連忙提醒自己要冷靜，深呼吸，以快打慢。急急腳到附近 Subway（全球化好處之一：地球村）慢吞吞食了午餐後再做多一次網上模擬考試，出發。
去到考試場地正好下午一點，還有十五分鐘。推門進內見到易拉架上的海報寫著：第一次考理論試前請拍照。Jeez！完全忘了要影相！這張相就會用在駕駛執照上，而我，師奶樣，頭髮隨意紮成馬尾，完全無化妝，哈哈，用兩個字來形容今日的我：樣衰。這就是衝動的後果。很快拍完，入場在指定位置坐下。
考場內分左右兩排座位，一排二人，總共可坐廿八人。來應考的有很多是非洲人（在瑞典考理論試可用以下語言：Albanian, Arabian, BKS (Bosnian, Croatian, Serbian), English, Finnish, French, Persian, Russian, Somalian, Kurdish, Spanish, Thai, Turkish & German），男性居多，女性得三位。近年來瑞典接收很多非洲難民。今日得我一個用英文來考試。
枱上面放著個很大的 touch screen，打斜30度（？）放在枱中間，旁邊有個小型計算機，右邊有個耳筒，可用可不用。考試有影片，但並沒聲音，帶耳筒可滅房內其他雜音。輸入自己 personal number 就可以開始。考試時間50分鐘，試題共70條，5條為 control 題目，不計分，所以全對為65分，答對52條為之合格（啊，忽然覺得廣東話「為之」好古文啊）。做完70條題目按螢幕上綠色的按鍵就可以提交試題，即時可知成績。
我好好運用考試49分鐘，最後一刻才提交試題。哈哈，全場只剩下我一個。做完再 go through 一次所有答案才提交。
離場後我立即發信息給雲先生。
今日好消息報告完畢：first attempt 成功！如今只要專注學好揸車就考得車牌啦！向前邁進一大步！
後記：考完後立即分享好消息給尚未考試成功的 Colombian 朋友，她立即請我星期五飲咖啡，哈哈。
話咁快又三月。
其實朋友（哥哥舊同學媽媽）邀請先請咗半日假去玩。我同雲先生覺得四歲嘅哥哥可以同朋友一齊去玩會開心啲。我哋全家都係第一次去呢間 Leos lekland，一入到去先知呢間遊樂場嘅遊玩擺設同哥德堡嗰間一模一樣，我估全國嘅 Leos lekland 都是大同小異（哥德堡嗰間可以上二樓玩，但呢間就無啦）。哥哥固然玩得好開心，細佬亦不停地跑來跑去，玩和探索；兩兄弟玩得不亦樂乎。如果得我一個去實應付唔來！佢哋兩兄弟各自跑來跑去，去玩心水遊戲，我同雲先生係咁追住陪玩，哈哈。
我哋星期五早上九點入場（明智之選），三小時小童票價209kr一位，成人29kr一位。玩到十一點左右午餐時間（開始多人）我哋就離場去附近 MAX Burger 食完午餐後返家。玩咗差唔多三個鐘，真係好攰。回程除咗揸車嘅雲先生無瞓之外，我哋三個都瞓著咗。
關於自然離乳，我之後再寫分享下經驗。
港媳講瑞 